ಕಿಡ್ನಿ ವೈಫಲ್ಯದಿಂದ ಹಾಸ್ಯ ನಟ ಗಂಡಸಿ ನಾಗರಾಜ್ ನಿಧನ – 100 ಕ್ಕೂ ಅಧಿಕ ಚಿತ್ರಗಳಲ್ಲಿ ನಟಿಸಿದ್ದ ಕಲಾವಿದ ಇನ್ನಿಲ್ಲ
- ಮನರಂಜನೆ
- December 12, 2022
- No Comment
- 181
ನ್ಯೂಸ್ ಆ್ಯರೋ : ಕನ್ನಡ ಚಿತ್ರರಂಗದಲ್ಲಿ ಹಲವು ವರ್ಷಗಳ ಕಾಲ ವಸ್ತ್ರಾಲಂಕಾರ ಕಲಾವಿದನಾಗಿ ಹಾಗೂ ನಟನಾಗಿ ಕೆಲಸ ಮಾಡಿದ್ದ ಗಂಡಸಿ ನಾಗರಾಜ್ (Gandasi Nagaraj) ಅವರು ಕಿಡ್ನಿ ವೈಫಲ್ಯದಿಂದ ಕಳೆದ ರಾತ್ರಿ 10:30 ಕ್ಕೆ ನಿಧನ ಹೊಂದಿದ್ದಾರೆ.
ಸುಮಾರು 40 ವರ್ಷಗಳ ಕಾಲ ನಟನಾಗಿ, ವಸ್ತ್ರ ವಿನ್ಯಾಸಕನಾಗಿ ಕನ್ನಡ ಚಿತ್ರರಂಗದ ಕಲಾ ಸೇವೆ ಮಾಡಿದ ಇವರು ಕಳೆದ 5 ತಿಂಗಳಿಂದ ಕಿಡ್ನಿ ವೈಫಲ್ಯದಿಂದ ಬಳಲುತ್ತಿದ್ದರು. ಕಳೆದ 4 ದಿನಗಳಿಂದ ದೇವೇಗೌಡ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು.
ಗಂಡಸಿ ನಾಗರಾಜ್ ಅವರಿಗೆ ಇಬ್ಬರು ಮಕ್ಕಳಿದ್ದು, ಮಗಳು ಕೊರೊನಾದಿಂದ ನಿಧನರಾಗಿದ್ದರು. ಇದೀಗ ಒಬ್ಬ ಮಗ ಮತ್ತು ಸೊಸೆಯನ್ನು ಅಗಲಿದ್ದಾರೆ.
ಗಂಡಸಿ ನಾಗರಾಜ್ ಅವರು ʻಸರ್ವರ್ ಸೋಮಣ್ಣʼ , ʻಸೂಪರ್ ನನ್ನ ಮಗʼ, ʻಭಂಡ ನನ್ನ ಗಂಡʼ , ʻಗುಂಡನ ಮದುವೆʼ ʻರಾಯರ ಮಗʼ , ʻಹಬ್ಬʼ , ʻಶ್ರೀ ಮಂಜುನಾಥʼ , ʻಮದುವೆʼ , ʻಮಾತಾಡು ಮಾತಾಡು ಮಲ್ಲಿಗೆʼ , ʻಪರ್ವʼ , ʻರಾಜಹುಲಿʼ, ʻಶಿಕಾರಿʼ ಹೀಗೆ ಹಲವು ಚಿತ್ರಗಳಲ್ಲಿ ಹಾಸ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ʻಕೋಟಿಗೊಬ್ಬ 3ʼ ಇವರ ಕೊನೆಯ ಚಿತ್ರವಾಗಿತ್ತು.
ನವರಸ ನಾಯಕ ಜಗ್ಗೇಶ್ ಅವರ ಆಪ್ತ ವಸ್ತ್ರಾಲಂಕಾರ ಕಲಾವಿದರಾಗಿದ್ದ ಗಂಡಸಿ ನಾಗರಾಜ್ ಅವರು, ಸರ್ವರ್ ಸೋಮಣ್ಣ, ಸೂಪರ್ ನನ್ ಮಗ, ಬಂಡ ನನ್ನ ಗಂಡ ಚಿತ್ರಗಳಲ್ಲಿ ಜೊತೆಯಾಗಿ ನಟಿಸಿದ್ದರು.