Kangana Ranaut : ದೇಶ ವಿರೋಧಿಗಳ ಬಗ್ಗೆ ಮಾತನಾಡಿದ್ದೇ ತಪ್ಪಾಯ್ತಾ? – 30 ಕೋಟಿ ರೂ. ಕಳೆದುಕೊಂಡ ಸ್ಟಾರ್ ನಟಿ
- ಮನರಂಜನೆ
- May 18, 2023
- No Comment
- 139
ನ್ಯೂಸ್ ಆ್ಯರೋ : ಬಾಲಿವುಡ್ ನ ಪ್ರತಿಭಾವಂತ ನಟಿಯರಲ್ಲಿ ಕಂಗನಾ ರನೌತ್ ಕೂಡಾ ಒಬ್ಬರು. ಚಿತ್ರರಂಗದ ಯಾವುದೇ ಹಿನ್ನಲೆಯಿಲ್ಲದ ಬಂದ ಅವರು ಸ್ಟಾರ್ ನಟಿಯಾಗಿ ಬೆಳೆದುದೇ ರೋಚಕ ಕಥೆ. ಉತ್ತಮ ನಟನೆಗಾಗಿ 4 ಬಾರಿ ರಾಷ್ಟ್ರ ಪ್ರಶಸ್ತಿ ಪಡೆದ ಈ ನಟಿ ಆಗಾಗ ವಿವಾದಾತ್ಮಕ ಹೇಳಿಕೆ ಮತ್ತು ನೇರ ನುಡಿಯಿಂದ ಸುದ್ದಿಯಾಗುತ್ತಾರೆ. ಈಗಲೂ ಕಂಗನಾ ಅಂತಹದ್ದೇ ಹೇಳಿಕೆಯೊಂದನ್ನು ನೀಡಿದ್ದು ಚರ್ಚೆಗೆ ಗ್ರಾಸವಾಗಿದೆ.
ರಾಜಕಾರಣಿಗಳು, ದೇಶ ವಿರೋಧಿಗಳ ಬಗ್ಗೆ ಮಾತನಾಡುತ್ತಿರುವುದಕ್ಕೆ ಸುಮಾರು 30 ಕೋಟಿ ರೂಪಾಯಿ ಹಣ ಕಳೆದುಕೊಂಡಿದ್ದೇನೆ ಎಂದು ಕಂಗನಾ ಹೇಳಿದ್ದಾರೆ. ಈ ಬಗೆಗಿನ ಅವರ ಇನ್ಸ್ಟಾಗ್ರಾಮ್ ಪೋಸ್ಟ್ ಸದ್ಯ ಭಾರೀ ಸದ್ದು ಮಾಡುತ್ತಿದೆ.
ಹಿಂದೂ ವಿರೋಧಿ, ದೇಶವಿರೋಧಿಗಳ ಬಗ್ಗೆ ಮಾತನಾಡಿದ್ದಕ್ಕೆ ಅನೇಕ ಸಂಸ್ಥೆಗಳು ನನ್ನನ್ನು ಬ್ರ್ಯಾಂಡ್ ಅಂಬಾಸಿಡರ್ ಸ್ಥಾನದಿಂದ ಕೈ ಬಿಟ್ಟವು. ಇದರಿಂದ ನನಗೆ 30-40 ಕೋಟಿ ರೂ. ನಷ್ಟವಾಗಿದೆ ಎಂದು ಕಂಗನಾ ಹೇಳಿಕೊಂಡಿದ್ದಾರೆ.
ಜೊತೆಗೆ ಅವರು ‘ನನಗೆ ಏನು ಅನ್ನಿಸುತ್ತದೆ ಅದನ್ನೇ ನಾನು ಮಾತನಾಡುತ್ತೇನೆ. ಅದರಿಂದ ನಾನು ಹಣ ಕಳೆದುಕೊಳ್ಳುತ್ತೇನೆ ಎಂದರೆ, ಅದು ಹಾಗೇ ಇರಲಿ ಎಂದು ಟ್ವಿಟರ್ ಮಾಲಕ ಎಲೋನ್ ಮಸ್ಕ್ ಒಮ್ಮೆ ಸಂದರ್ಶನದಲ್ಲಿ ಹೇಳಿದ್ದರು. ಆ ಸಂದರ್ಶನದ ಸ್ಕ್ರೀನ್ಶಾಟನ್ನು ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹಂಚಿಕೊಂಡಿದ್ದಾರೆ.
ನಾನು ಸ್ವತಂತ್ರಳು. ನನಗೆ ಬೇಕಾದ ಹಾಗೆ ಬದುಕುತ್ತೇನೆ. ಅನ್ನಿಸಿದ್ದನ್ನು ಹೇಳುತ್ತೇನೆ, ಭಾರತದ ಸಂಸ್ಕೃತಿ, ಸಮಗ್ರತೆಗೆ ಬೆಲೆ ಕೊಡದ ಕಾರ್ಪೊರೇಟ್ ಬ್ರ್ಯಾಂಡ್ ಮುಖ್ಯಸ್ಥರು ನನಗೆ ಮುಖ್ಯವಲ್ಲ. ನಾನು ಎಲೋನ್ ಮಸ್ಕ್ನನ್ನು ಪ್ರಶಂಸಿಸುತ್ತೇನೆ. ಶ್ರೀಮಂತರು ಹಣದ ಬಗ್ಗೆ ಕಾಳಜಿ ವಹಿಸಬಾರದು ಎಂದು ಕಂಗನಾ ಬರೆದುಕೊಂಡಿದ್ದಾರೆ.