ಬರೋಬ್ಬರಿ 4 ಕೋಟಿ ರೂ. ಬೆಲೆಯ ಕಾರು ಖರೀದಿಸಿದ ರಣಬೀರ್ ಕಪೂರ್ – ಯಾವ ಕಾರ್? ಏನಿದರ ವಿಶೇಷತೆ?

ನ್ಯೂಸ್ ಆ್ಯರೋ‌ : ಬಾಲಿವುಡ್ ನಟ ರಣಬೀರ್ ಕಪೂರ್ ಸದ್ಯ ದುಬಾರಿ ಬೆಲೆಯ ರೇಂಜ್ ರೋವರ್ ಕಾರು ಖರೀದಿಸಿ ಸುದ್ದಿಯಾಗಿದ್ದಾರೆ. ಸಾಕಷ್ಟು ಕಾರು ಕ್ರೇಜ್ ಹೊಂದಿರುವ ಈ ಬ್ರಹ್ಮಾಸ್ತ್ರ ನಟನ ಸಂಗ್ರಹಕ್ಕೆ ಮತ್ತೊಂದು ವಿಶೇಷ ವಾಹನದ ಸೇರ್ಪಡೆಯಾಗಿದೆ.

ಮಾಡೆಲ್ ಯಾವುದು?

ರಣಬೀರ್ ಕಪೂರ್ 5ನೇ ತಲೆಮಾರಿನ ನ್ಯೂ ರೇಂಜ್ ರೋವರ್ ಕಾರನ್ನು ಖರೀದಿಸಿದ್ದಾರೆ. ಕಳೆದ ವರ್ಷ ಆಗಸ್ಟ್ ನಲ್ಲಿ ಈ ಮಾಡೆಲ್ ಲಾಂಚ್ ಆಗಿತ್ತು. ಇದರ ಬೆಲೆ 4 ಕೋಟಿ ರೂ. ಇದು ಭಾರತದಲ್ಲಿ ಬೆಂಟ್ಲಿ ಬೆಂಟ್ಯಾಗ್ಯಾ, ಮೇಬಾಕ್ ಜಿ.ಎಲ್.ಎಸ್., ಆಸ್ಟ್ರನ್ ಮಾರ್ಟಿನ್ ಡಿ.ಬಿ.ಎಕ್ಸ್. ಮುಂತಾದ ಕಾರುಗಳಿಗೆ ಪೈಪೋಟಿ ನೀಡುತ್ತದೆ.

ಈ ಮಾಡೆಲ್ ಪೂರ್ಣ ಇಂಡಿಪೆಂಡೆಂಟ್ ಏರ್ ಸಸ್ಪೆನ್ಷನ್ ಸಿಸ್ಟಮ್ ಮತ್ತು ಆಲ್ ವ್ಹೀಲ್ ಸ್ಟಿಯರಿಂಗ್ ಹೊಂದಿದೆ. 6 ಮತ್ತು 8 ಸಿಲಿಂಡರ್ ಆಯ್ಕೆಗಳ ಎಂಜಿನ್ ನಲ್ಲಿ ಈ ಮಾದರಿ ಕಾರು ಲಭ್ಯ. ಇದರಲ್ಲಿ 4.4 ಲೀಟರ್ ನ ಟ್ವಿನ್ ಟರ್ಬೊ ವಿ8 ಎಂಜಿನ್ ಇದೆ. ಇದು 523 ಬಿ.ಎಚ್.ಪಿ. ಮತ್ತು 750 ಎನ್.ಎಂ. ಪೀಕ್ ಟಾರ್ಕ್ ಒದಗಿಸುತ್ತದೆ.

ರಣಬೀರ್ ಕಪೂರ್ ಬಳಿ ಈಗಾಗಲೇ ಮರ್ಸಿಡಿಸ್ ಬೆಂಝ್ ಎಎಂಜಿ ಜಿ 63, ಔಡಿ ಎ8ಎಲ್, ಲ್ಯಾಂಡ್ ರೇಂಜ್ ರೋವರ್ ಸ್ಪೋರ್ಟ್, ಲ್ಯಾಂಡ್ ರೋವರ್ ರೇಂಜ್ ರೋವರ್ ವೋಗ್ಯೂ ಮತ್ತಿತರ ಕಾರುಗಳ ಸಂಗ್ರಹವಿದೆ.

ಇನ್ನು ಸಿನಿಮಾಗಳ ವಿಚಾರಕ್ಕೆ ಬರುವುದಾದರೆ ರಣಬೀರ್ ಕಪೂರ್ ಸದ್ಯ ‘ಅನಿಮಲ್’ ಚಿತ್ರದ ಕೆಲಸದಲ್ಲಿ ನಿರತರಾಗಿದ್ದಾರೆ. ಕನ್ನಡತಿ ರಶ್ಮಿಕಾ ಮಂದಣ್ಣ ನಾಯಕಿಯಾಗಿರುವ ಈ ಚಿತ್ರಕ್ಕೆ ಸಂದೀಪ್ ರೆಡ್ಡಿ ವಂಗ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ. ಬಹು ನಿರೀಕ್ಷಿತ ಈ ಸಿನಿಮಾ ಡಿಸೆಂಬರ್ 1ರಂದು ತೆರೆಗೆ ಬರಲಿದೆ.