ದಾಂಪತ್ಯ ಜೀವನಕ್ಕೆ ಕಾಲಿಟ್ಟ ‘ಕಾಮಿಡಿ ಕಿಲಾಡಿ’ ಹಿತೇಶ್ ಕಾಪಿನಡ್ಕ – ಹತ್ತು ವರ್ಷದ ಪ್ರೀತಿಗೆ ಮುದ್ರೆ ಹಾಕಿದ ಪ್ಯಾಕೂ ಪ್ಯಾಕೂ

ನ್ಯೂಸ್ ಆ್ಯರೋ : ಕಾಮಿಡಿ ಕಿಲಾಡಿಗಳು ‘ಪ್ಯಾಕೂ ಪ್ಯಾಕೂ’ ಖ್ಯಾತಿಯ ಹಿತೇಶ್ ಕುಮಾರ್ ಕಾಪಿನಡ್ಕ ಅವರು ಪ್ರೀತಿಸಿದ ಹುಡುಗಿ ಜತೆ ಕಳೆದ ಭಾನುವಾರ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.

ಹಿತೇಶ್ ಕುಮಾರ್ ಕಾಪಿನಡ್ಕ ಹಾಗೂ ಸ್ವಾತಿ ಕಲ್ಯಾಣಕ್ಕೆ ಕುಟುಂಬಸ್ಥರು, ಆಪ್ತರು,‘ಕಾಮಿಡಿ ಕಿಲಾಡಿಗಳು’, ಕಲಾವಿದರು ಸಾಕ್ಷಿಯಾಗಿದ್ದರು. ಡಿಸೆಂಬರ್ 19, 2021 ರಂದು ಹಿತೇಶ್ ಕುಮಾರ್ ಕಾಪಿನಡ್ಕ ಹಾಗೂ ಸ್ವಾತಿ ಅವರ ನಿಶ್ಚಿತಾರ್ಥ ನಡೆದಿತ್ತು.

10 ವರ್ಷದ ಪ್ರೀತಿಗೆ ಮದುವೆಯ ಮುದ್ರೆ:

ಹಿತೇಶ್ ಕುಮಾರ್ ಕಾಪಿನಡ್ಕ ಹಾಗೂ ಸ್ವಾತಿ ಕಳೆದ ಒಂದು ದಶಕದಿಂದ ಪರಸ್ಪರ ಪ್ರೀತಿಸುತ್ತಿದ್ದಾರೆ. ಹಿತೇಶ್ ಕುಮಾರ್ ಕಾಪಿನಡ್ಕ ಮತ್ತು ಸ್ವಾತಿ ಒಂದೇ ಗ್ರಾಮಕ್ಕೆ ಸೇರಿದವರು. ದೇವಸ್ಥಾನವೊಂದರಲ್ಲಿ ಸ್ವಾತಿ ಅವರನ್ನು ಹಿತೇಶ್ ಮೊದಲ ಬಾರಿಗೆ ನೋಡಿದ್ದರು. ಆನಂತರ ಪರಿಚಯವಾದ ಇವರಿಬ್ಬರು ಸ್ನೇಹಿತರಾದರು. ಸ್ನೇಹ ಪ್ರೀತಿಗೆ ತಿರುಗಿದೆ. ಇದೀಗ ಕುಟುಂಬದವರ ಸಮ್ಮುಖದಲ್ಲಿ ಈ ಜೋಡಿ ಹಸೆಮಣೆ ಏರಿದೆ.

ಜೀ ‘ಕಾಮಿಡಿ ಕಿಲಾಡಿಗಳು’ ಕಾರ್ಯಕ್ರಮದಲ್ಲಿ ಹಿತೇಶ್ ಕುಮಾರ್ ಕಾಪಿನಡ್ಕ ಎರಡನೇ ರನ್ನರ್ ಅಪ್ ಆಗಿ ಹೆಸರು ಗಳಿಸಿದ್ದರು. ಇವರ ಲೇಡಿ ಗೆಟಪ್ ಮಾತ್ರ ವೀಕ್ಷರಿಗೆ ಹೊಟ್ಟೆ ಹುಣ್ಣಾಗಿಸುತ್ತಿತ್ತು. ಅದಾದ ಬಳಿಕ ಇವರಿಗೆ ಸಿನಿಮಾಗಳಲ್ಲಿ ಅವಕಾಶಗಳು ಹುಡುಕಿಕೊಂಡು ಬಂದವು.

ಗೋವಿಂದೇ ಗೌಡ ನಿರ್ದೇಶನದ ‘ಜಂತರ್ ಮಂತರ್’, ಗೋಲ್ಡನ್ ಸ್ಟಾರ್ ಗಣೇಶ್ ನಟನೆಯ ‘ಗೀತಾ’, ಮನೋರಂಜನ್ ರವಿಚಂದ್ರನ್ ಅಭಿನಯದ ‘ಮುಗಿಲ್‌ಪೇಟೆ’, ‘ಯಜಮಾನ’, ‘ಏಕ್‌ ಲವ್ ಯಾ’ ಮುಂತಾದ ಸಿನಿಮಾಗಳಲ್ಲಿ ಹಿತೇಶ್ ಕುಮಾರ್ ಕಾಪಿನಡ್ಕ ಮಿಂಚಿದ್ದಾರೆ. ತುಳು ಸಿನಿಮಾಗಳಲ್ಲೂ ಹಿತೇಶ್ ಕುಮಾರ್ ಕಾಪಿನಡ್ಕ ಕಾಣಿಸಿಕೊಂಡಿದ್ದಾರೆ.