ಹಸುವನ್ನು ಮುಂದೆ ಕೂರಿಸಿಕೊಂಡು ಕಾರ್ ನಲ್ಲಿ ಜಾಲಿ ರೈಡ್ ಹೋದ ಯುವಕ – ಈ ವೈರಲ್ ವಿಡಿಯೋ ನೋಡಿದ್ರೆ ತಲೆ ತಿರುಗುತ್ತೆ..!

ನ್ಯೂಸ್ ಆ್ಯರೋ : ನೀವು ಈ ಸಾಮಾಜಿಕ ಜಾಲತಾಣ ಅನ್ನುವ ವಿಚಿತ್ರ ಜಗತ್ತಿನಲ್ಲಿ ಎಷ್ಟೆಲ್ಲಾ ವಿಚಿತ್ರಗಳನ್ನು ಕಂಡಿರಬಹುದು. ಒಂದೇ ಬೈಕಿನಲ್ಲಿ ಇಬ್ಬರು, ಮೂವರು, ಹೆಚ್ಚೆಂದರೆ ಹತ್ತು ಜನರು ಒಂದೇ ಬಾರಿಗೆ ರೈಡ್ ಹೋಗುವುದನ್ನು ಕಂಡಿರಬಹುದು. ಆದರೆ ಹಸುವೊಂದನ್ನು ಬೈಕಿನಲ್ಲಿ ಕೂರಿಸಿಕೊಂಡು ಜಾಲಿ ರೈಡ್ ಹೋಗುವುದನ್ನು ಕಂಡಿದ್ದೀರಾ? ಇದು ಕೇಳಲು ವಿಚಿತ್ರ ಎನಿಸಿದರೂ ಸತ್ಯ ಸಂಗತಿ. ಇಂತಹದ್ದೊಂದು ವಿಚಿತ್ರ ಘಟನೆ ಇದೀಗ ಬೆಳಕಿಗೆ ಬಂದಿದ್ದು, ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗುತ್ತಿದೆ‌.

ಹಸು ಮುಂದೆ, ರೈಡರ್ ಹಿಂದೆ!

ಸದ್ಯ, ವೈರಲ್ ಆಗುತ್ತಿರುವ ವಿಡಿಯೋದಲ್ಲಿ ವ್ಯಕ್ತಿಯೊಬ್ಬ ತನ್ನ ಬೈಕ್‌ ಮೇಲೆ ಹಸುವನ್ನು ಕೂರಿಸಿಕೊಂಡು ಸವಾರಿ ಮಾಡುತ್ತಿರುವುದನ್ನು ನೀವು ನೋಡಬಹುದು. ಇಂತಹ ವಿಶಿಷ್ಟವಾದ ಸವಾರಿ ನೀವು ಬಹುಶಃ ಹಿಂದೆಂದೂ ನೋಡಿರಲಿಕ್ಕಿಲ್ಲ. ವ್ಯಕ್ತಿಯೊಬ್ಬ ಹಸುವನ್ನು ಬೈಕ್ ನಲ್ಲಿ ತನ್ನ ಮುಂದೆ ಕೂರಿಸಿ ಹಸುವಿನ ಹಿಂಬದಿಗೆ ಕುಳಿತು ಬೈಕ್ ಸವಾರಿ ಮಾಡಿದ್ದಾನೆ‌.

ದೊಡ್ಡ ಕೊಂಬುಗಳನ್ನು ಹೊಂದಿರುವ ಹಸು ಕೂಡ ಬಹಳ ಖುಷಿಯಿಂದ ಬೈಕ್ ಸವಾರಿಯನ್ನು ಆನಂದಿಸುತ್ತಿದೆ. ಈ ತಮಾಷೆಯ ದೃಶ್ಯವನ್ನು ಕಾರ್ ಸವಾರನೊಬ್ಬ ತನ್ನ ಮೊಬೈಲ್‌ನಲ್ಲಿ ರೆಕಾರ್ಡ್ ಮಾಡಿದ್ದು, ಇದು ಸಾಮಾಜಿಕ ಜಾಲತಾಣಗಳಲ್ಲಿ ಕ್ಷಣಮಾತ್ರದಲ್ಲಿ ವೈರಲ್ ಆಗಿದೆ.

ಲಕ್ಷಾಂತರ ವೀಕ್ಷಣೆ ಪಡೆದ ವಿಡಿಯೋ..!

ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾದ ವಿಡಿಯೋದ ಕೆಳಗೆ ಷೇರು ಮಾರುಕಟ್ಟೆ ಶೈಲಿಯಲ್ಲಿ ‘ರ್ಯಾಲಿಯಲ್ಲಿ ಬುಲ್ ಅನ್ನು ಸವಾರಿ ಮಾಡುವುದು ಅಂದರೆ ಇದೆ ನೋಡಿ’ ಎಂಬ ತಮಾಷೆಯ ಶೀರ್ಷಿಕೆ ಬರೆಯಲಾಗಿದೆ. ಕೇವಲ 12 ಸೆಕೆಂಡ್ ಗಳ ಈ ವೀಡಿಯೋ ಇದುವರೆಗೆ 1 ಲಕ್ಷ 93 ಸಾವಿರಕ್ಕೂ ಹೆಚ್ಚು ಬಾರಿ ವೀಕ್ಷಣೆಗೆ ಒಳಗಾಗಿದ್ದು, ನೂರಾರು ಮಂದಿ ಲೈಕ್ ಕೂಡ ಮಾಡಿದ್ದಾರೆ. ಈ ವಿಡಿಯೋ‌ ಕಂಡಿರುವ ನೆಟ್ಟಿಗರು ಮನಬಂದಂತೆ ಕಮೆಂಟ್ ಮಾಡುತ್ತಿದ್ದಾರೆ.