ಇನ್ಮುಂದೆ ವಿಂಡೋಸ್ 11ಗೆ ಅಪ್ಡೇಟ್ ಮಾಡಲು ಹಣ ಪಾವತಿ ಕಡ್ಡಾಯ – ವಿಶ್ವದ ಟೆಕ್ ದಿಗ್ಗಜ ಮೈಕ್ರೋಸಾಫ್ಟ್‌ನಿಂದ ಅಧಿಕೃತ ಘೋಷಣೆ

ನ್ಯೂಸ್ ಆ್ಯರೋ : ವಿಂಡೋಸ್​ 7 ಮತ್ತು 8ರ ಬಳಕೆದಾರರು ವಿಂಡೋಸ್​ 11 ಅಪ್​ಡೇಟ್ ಪಡೆಯಬೇಕಾದರೆ ಹಣ ಪಾವತಿಸುವುದು ಇನ್ನು ಮುಂದೆ ಕಡ್ಡಾಯವಾಗಲಿದೆ ಎಂದು ಮೈಕ್ರೋಸಾಫ್ಟ್ ಹೇಳಿದೆ.

ಇತ್ತೀಚಿನವರೆಗೆ ವಿಂಡೋಸ್ 7 ಮತ್ತು 8 ಬಳಕೆದಾರರು ವಿಂಡೋಸ್​ 11 ಗೆ ಉಚಿತವಾಗಿ ಅಪ್​ಗ್ರೇಡ್ ಮಾಡಿಕೊಳ್ಳಬಹುದಿತ್ತು. ಆದರೆ ಇನ್ನು ಮುಂದೆ ಉಚಿತವಾಗಿ ವಿಂಡೋಸ್​ 11 ಡೌನ್ಲೋಡ್​ ಮಾಡುವುದನ್ನು ಮೈಕ್ರೊಸಾಫ್ಟ್​ ನಿರ್ಬಂಧಿಸಿದೆ. ಮೈಕ್ರೊಸಾಫ್ಟ್​ ತಂತ್ರಾಂಶ ವ್ಯವಸ್ಥೆಯಲ್ಲಿನ ಯಾವುದೋ ಒಂದು ದೋಷದಿಂದ ವಿಂಡೋಸ್ 7 ಮತ್ತು 8 ಬಳಕೆದಾರರಿಗೆ ಇಷ್ಟು ದಿನ ಉಚಿತವಾಗಿ ವಿಂಡೋಸ್​ 11 ಗೆ ಅಪ್​ಗ್ರೇಡ್​ ಮಾಡಲು ಸಾಧ್ಯವಾಗಿತ್ತು ಎನ್ನಲಾಗಿದೆ.

ಹಳೆಯ ವಿಂಡೋಸ್ ಪಿಸಿ ಬಳಕೆದಾರರು ಈಗ ಹೊಸ ಆವೃತ್ತಿಯನ್ನು ಇನ್​ಸ್ಟಾಲ್ ಮಾಡಬೇಕಾದರೆ ವಿಂಡೋಸ್ 11 ಕೀ ಪಡೆಯಬೇಕಾಗುತ್ತದೆ. ಅಂದರೆ ಅವರು ತಮ್ಮ ಪಿಸಿಗೆ ವಿಂಡೋಸ್ 11 ಪಡೆಯಲು ಶುಲ್ಕ ಪಾವತಿಸಬೇಕಾಗುತ್ತದೆ. ಮೈಕ್ರೊಸಾಫ್ಟ್​ ಡೇಟಾಬೇಸ್ ನೊಂದಿಗೆ ನಿಮ್ಮ ಸಿಸ್ಟಂ ಅನ್ನು ನೋಂದಾಯಿಸಲು ಕೀ ಸಕ್ರಿಯಗೊಳಿಸುವುದು ಅತ್ಯಗತ್ಯ ಮತ್ತು ಕೀ ಇಲ್ಲದಿದ್ದರೆ ನಿಮ್ಮ ಸಿಸ್ಟಂನಲ್ಲಿ ರನ್ ಆಗುತ್ತಿರುವ ವಿಂಡೋಸ್​ ಆವೃತ್ತಿಯು ಅಮಾನ್ಯವಾಗುತ್ತದೆ.

ಇದು ಈಗಾಗಲೇ ವಿಂಡೋಸ್​ 7 ಅಥವಾ 8 ಕೀಯನ್ನು ಬಳಸಿ ವಿಂಡೋಸ್​ 11 ಇನ್​ಸ್ಟಾಲ್ ಮಾಡಿಕೊಂಡು ಸಾಫ್ಟ್​ವೇರ್​ ಅನ್ನು ಬಳಸುತ್ತಿರುವ ಗ್ರಾಹಕರಿಗೆ ಯಾವುದೇ ಸಮಸ್ಯೆಯಿಲ್ಲ. ವಿಂಡೋಸ್ 11 ಇದು ಮೈಕ್ರೋಸಾಫ್ಟ್​ನ ಹೊಸ ಆಪರೇಟಿಂಗ್ ಸಿಸ್ಟಮ್ ಆವೃತ್ತಿಯಾಗಿದೆ ಮತ್ತು ಇದು ವಿಂಡೋಸ್ 10 ನಂತರದ ಆವೃತ್ತಿಯಾಗಿದೆ. ವಿಂಡೋಸ್​ 10 ಬಿಡುಗಡೆಯಾಗಿ 6 ವರ್ಷಗಳ ನಂತರ ವಿಂಡೋಸ್​ 11 ಬಂದಿದ್ದು ಗಮನಾರ್ಹ.

ವಿಂಡೋಸ್ 11 ಆಪರೇಟಿಂಗ್​ ಸಿಸ್ಟಮ್ ತಯಾರಿಕಾ ಕಂಪನಿಯಾಗಿರುವ ಮೈಕ್ರೊಸಾಫ್ಟ್​ ವಿಶ್ವದ ಅತಿದೊಡ್ಡ ಕಂಪ್ಯೂಟರ್ ಸಾಫ್ಟ್​ವೇರ್​ ಕಂಪನಿಯೂ ಆಗಿದೆ. ವರ್ಡ್ ಮತ್ತು ಎಕ್ಸೆಲ್ ನಂತರ ಡೆಸ್ಕ್ ಟಾಪ್ ಆಫೀಸ್ ಅಪ್ಲಿಕೇಶನ್​ಗಳಿಂದ ಹಿಡಿದು ಕ್ಲೌಡ್ ಪ್ಲಾಟ್ ಫಾರ್ಮ್ ಗಳು ಮತ್ತು ಜೌಟ್‌ಲುಕ್‌ ನಂತಹ ಇಮೇಲ್ ಸೇವೆಗಳವರೆಗೆ ಹಲವಾರು ಉತ್ಪನ್ನಗಳನ್ನು ಕಂಪನಿ ತಯಾರಿಸುತ್ತದೆ. ಮೈಕ್ರೋಸಾಫ್ಟ್ ಯುಎಸ್ ಮೂಲದ ತಂತ್ರಜ್ಞಾನ ಕಂಪನಿಯಾಗಿದೆ. ಇದನ್ನು 1975 ರಲ್ಲಿ ಬಿಲ್ ಗೇಟ್ಸ್ ಮತ್ತು ಪಾಲ್ ಅಲೆನ್ ಸ್ಥಾಪಿಸಿದರು.