ಇನ್ನಿಂಗ್ಸ್ ನ ಮೊದಲ ಎಸೆತಕ್ಕೆ ಬ್ಯಾಟ್ ಕಟ್, ಎರಡನೇ ಎಸೆತಕ್ಕೆ ಕ್ಲೀನ್ ಬೌಲ್ಡ್ – ಶಹೀನ್ ಅಫ್ರಿದಿಯ ಬಿರುಗಾಳಿ ಎಸೆತಗಳ ವಿಡಿಯೋ ವೈರಲ್…!!

ನ್ಯೂಸ್ ಆ್ಯರೋ : ಪಾಕಿಸ್ತಾನದಲ್ಲಿ ನಡೆಯುತ್ತಿರುವ ಪಾಕಿಸ್ತಾನ ಸೂಪರ್ ಲೀಗ್ 2023 ಟೂರ್ನಿಯಲ್ಲಿ ಭಾನುವಾರ ಲಾಹೋರ್ನ ಗಡಾಫಿ ಸ್ಟೇಡಿಯಂನಲ್ಲಿ ನಡೆದ ಲಾಹೋರ್ ಕಲಂದರ್ಸ್ ಹಾಗೂ ಪೇಶಾವರ್ ಜಲ್ಮಿ (LHQ vs PSZ) ನಡುವಣ ಹೈಸ್ಕೋರ್ ಪಂದ್ಯದಲ್ಲಿ ದ್ವಿತೀಯ ಇನ್ನಿಂಗ್ಸ್ ಅರಂಭವಾದ ಮೊದಲ ಎಸೆತದಲ್ಲೇ ಬ್ಯಾಟ್ಸ್‌ಮನ್‌ ನ ಬ್ಯಾಟ್ ಕಟ್ ಆದರೆ, ಎರಡನೇ ಎಸೆತದಲ್ಲಿ ಆತ ಬೌಲ್ಡ್ ಆಗಿದ್ದು, ಈ ವಿಡಿಯೋ ವೈರಲ್ ಆಗಿದೆ.

ಈ ಪಂದ್ಯದಲ್ಲಿ ಉಭಯ ತಂಡಗಳ ಮೊತ್ತ 200ರ ಗಡಿ ದಾಟಿದ್ದವು. ಶಾಹಿನ್ ಆಫ್ರಿದಿ (Shaheen Afridi) ಹಾಗೂ ಬಾಬರ್ ಅಜಮ್ ನಡುವಣ ಕಾಳಗದಲ್ಲಿ ಶಾಹಿನ್ ನಾಯಕತ್ವದ ಲಾಹೋರ್ ಕಲಂದರ್ಸ್ ತಂಡ 40 ರನ್​ಗಳ ಭರ್ಜರಿ ಜಯ ಸಾಧಿಸಿತು.

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದ್ದ ಲಾಹೋರ್ ಕಲಂದರ್ಸ್ ತಂಡ 20 ಓವರ್ಗಳಲ್ಲಿ ಬರೋಬ್ಬರಿ 241 ರನ್ ಕಲೆಹಾಕಿತು. ಕಠಿಣ ಟಾರ್ಗೆಟ್ ಬೆನ್ನಟ್ಟಿದ ಪೇಶಾವರ್ ಜಲ್ಮಿ ಮೊದಲ ಓವರ್ನಲ್ಲೇ ವಿಕೆಟ್ ಕಳೆದುಕೊಂಡಿತು. ಓಪನರ್ ಮೊಹಮ್ಮದ್ ಹ್ಯಾರಿಸ್ ಅವರು ಶಾಹಿನ್ ಅಫ್ರಿದಿ ಅವರ ಎರಡನೇ ಎಸೆತದಲ್ಲೇ ಕ್ಲೀನ್ ಬೌಲ್ಡ್ ಆದರು.

ಇದಕ್ಕೂ ಮುನ್ನ ಹಾಕಿದ ಮೊದಲ ಎಸೆತದಲ್ಲಿ ಹ್ಯಾರಿಸ್ ಬ್ಯಾಟ್ ತುಂಡಾದ ಪ್ರಸಂಗ ನಡೆಯಿತು. ಆಫ್ರಿದಿ ಮಾರಕ ವೇಗಕ್ಕೆ ಬ್ಯಾಟ್ ಎರಡು ಭಾಗವಾಗಿದ್ದು, ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದೆ. ಪೇಶಾವರ್ ತಂಡ 20 ಓವರ್​ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 201 ರನ್ ಗಳಿಸಿ ಸೋಲನುಭವಿಸಿದರೆ, ಲಾಹೋರ್ ಪರ ಶಹೀನ್ ಅಫ್ರಿದಿ 5 ವಿಕೆಟ್ ಕಿತ್ತು ಮಿಂಚಿದರು.