GST ಪಾವತಿಸದೇ ವಂಚನೆ ಆರೋಪ – ಅದಾನಿ ಗ್ರೂಪ್ ನ ಕಂಪನಿ ಕಚೇರಿಗೆ ತೆರಿಗೆ ಇಲಾಖೆ ದಾಳಿ

ನ್ಯೂಸ್‌ ಆ್ಯರೋ : ಹಿಂಡನ್ ಬರ್ಗ್ ವರದಿ ಬಳಿಕ ಅದಾನಿ ಕಂಪನಿ ನಷ್ಟದ ಪಾತಾಳದತ್ತ ಕುಸಿಯುತ್ತಿದ್ದು, ಇದರ ನಡುವೆ ಹಿಮಾಚಲ ಪ್ರದೇಶದ ಖಾದ್ಯ ತೈಲ ಉತ್ಪಾದಕ ಅದಾನಿ ವಿಲ್ಮರ್‌ ಗ್ರೂಪ್‌ನ ಕಚೇರಿಗೆ ರಾಜ್ಯ ಅಬಕಾರಿ ಮತ್ತು ತೆರಿಗೆ ಇಲಾಖೆಯ ತಂಡ ದಾಳಿ ನಡೆಸಿದೆ.

ಜಿಎಸ್‌ಟಿಯನ್ನು ಕಂಪನಿ ಸರಿಯಾಗಿ ಪಾವತಿಸಿಲ್ಲ ಎಂಬ ಆರೋಪಗಳ ಹಿನ್ನೆಲೆಯಲ್ಲಿ ಈ ದಾಳಿ ನಡೆದಿದೆ ಎಂದು ಮೂಲಗಳು ತಿಳಿಸಿವೆ.

ವಿಲ್ಮರ್‌ ಗ್ರೂಪ್‌ ಮಾಡಿರುವ ಜಿಎಸ್‌ಟಿ ಇನ್‌ಪುಟ್‌ ಟ್ಯಾಕ್ಸ್‌ ಕ್ರೆಡಿಟ್‌ ಕ್ಲೇಮ್‌ಗಳ ಬಗ್ಗೆ ಕೂಡ ತನಿಖೆ ನಡೆಯುತ್ತಿದೆ. ಕಳೆದ 5 ವರ್ಷಗಳಿಂದ ಕಂಪನಿಯು ಜಿಎಸ್‌ಟಿ ಪಾವತಿಸಿಲ್ಲ. ಈ ಹಿನ್ನೆಲೆಯಲ್ಲಿ ಅಧಿಕಾರಿಗಳ ತಂಡ ದಾಳಿ ನಡೆಸಿದ್ದು, ದಾಖಲಾತಿಗಳನ್ನು ಪರೀಕ್ಷಿಸಿದೆ ಎಂದು ಮೂಲಗಳು ತಿಳಿಸಿವೆ.

ಕಳೆದ ಅಕ್ಟೋಬರ್-ಡಿಸೆಂಬರ್‌ ಅವಧಿಯಲ್ಲಿ ಅದಾನಿ ವಿಲ್ಮರ್‌ ಗ್ರೂಪ್‌ 211 ಕೋಟಿ ರೂ. ನಿವ್ವಳ ಲಾಭವನ್ನು ಗಳಿಸಿತ್ತು. ಆದಾಯವು 15,515 ಕೋಟಿ ರೂ.ಗೆ ವೃದ್ಧಿಸಿದ್ದು, ಜಿಎಸ್ಟಿ ಪಾವತಿಸದೇ ವಂಚಿಸಿದೆ ಎಂಬ ಆರೋಪ ಕೇಳಿಬಂದಿದೆ.