ಕೊರಿಯನ್‌ ಸಿಂಗರ್ ಜಿಮಿನ್‌ನಂತೆ ಕಾಣಲು 12 ಪ್ಲಾಸ್ಟಿಕ್ ಸರ್ಜರಿ: ₹1.80 ಕೋಟಿ ಖರ್ಚು ಮಾಡಿದ್ದ ಯುವ ನಟ ಸಾವು
- ಮನರಂಜನೆ
- April 26, 2023
- No Comment
- 184
ನ್ಯೂಸ್ ಆ್ಯರೋ: ದಕ್ಷಿಣ ಕೊರಿಯಾದ ಖ್ಯಾತ ಸಿಂಗರ್ ಜಿಮಿನ್ ಹಾಗೆಯೇ ಕಾಣಬೇಕು ಎಂದು ಸುಮಾರು ₹1.80 ಕೋಟಿ ಖರ್ಚು ಮಾಡಿ 12 ಸರ್ಜರಿ ಮಾಡಿಸಿದ್ದ ಯುವಕ ಮೃತಪಟ್ಟಿದ್ದಾನೆ.
ಸಂಗೀರ ಕ್ಷೇತ್ರದಲ್ಲಿ ಉನ್ನತ ಸಾಧನೆ ಮಾಡಬೇಕು ಎಂದು ಕನಸು ಕಂಡಿದ್ದ 22 ವರ್ಷದ ಕೆನಡಿಯನ್ ನಟ ಸೇಂಟ್ ವಾನ್ ಕೊಲುಸಿ ಬಾರದ ಲೋಕಕ್ಕೆ ಹೋಗಿದ್ದಾನೆ.
ಕೊರಿಯಾದ ಖ್ಯಾತ ಬಿಟಿಎಸ್ ಬ್ಯಾಂಡ್‌ನ ಸದಸ್ಯ ಜಿಮಿನ್ ರೀತಿ ಕಾಣಿಸಬೇಕು ಎಂದು ಬಯಸಿದ್ದ ಯುವಕ 12 ಸರ್ಜರಿ ಮಾಡಿಸಿ, ದಕ್ಷಿಣ ಕೊರಿಯಾದ ಆಸ್ಪತ್ರೆಯಲ್ಲಿ ಭಾನುವಾರ ಮೃತಪಟ್ಟಿದ್ದಾನೆ.
ಆತನಕ ಸಾವಿಗೆ ಪ್ಲಾಸ್ಟಿಕ್ ಸರ್ಜರಿಯೇ ಕಾರಣ ಎನ್ನಲಾಗಿದೆ. ಕೆಲವು ತಿಂಗಳ ಹಿಂದೆ ಈತ 12 ಪ್ಲಾಸ್ಟಿಕ್ ಸರ್ಜರಿಗಳನ್ನು ಮಾಡಿಸಿಕೊಂಡಿದ್ದು, ಇದಾದ ನಂತರ ಆತನ ಆರೋಗ್ಯದಲ್ಲಿ ಏರುಪೇರಾಗಿತ್ತು. ಆರೋಗ್ಯ ಹದಗೆಟ್ಟ ಹಿನ್ನೆಲೆಯಲ್ಲಿ ಆತನನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು.
ಸೇಂಟ್ ವಾನ್ ಕೊಲುಸಿ ಒಟ್ಟು 12 ಬಾರಿ ಪ್ಲಾಸ್ಟಿಕ್ ಸರ್ಜರಿಗಾಗಿ 220,000 ಡಾಲರ್ ಅಂದರೆ (₹1.80 ಕೋಟಿ) ಖರ್ಚು ಮಾಡಿದ್ದ. ಸರ್ಜರಿಯ ನಂತರ ಅಮೆರಿಕದಲ್ಲಿ ಪ್ರಸಾರದಲ್ಲಿರುವ ಕೆ ಪಾಪ್ ಸ್ಟಾರ್ ಸೀರಿಸ್‌ನಲ್ಲಿ ನಟಿಸಲು ಆತ ಬಯಸಿದ್ದ ಎನ್ನಲಾಗಿದೆ.
ಕಳೆದ ನವೆಂಬರ್‌ನಲ್ಲಿ ಈತ ಮಾಡಿಸಿಕೊಂಡಿದ್ದ ದವಡೆಯ ಕಸಿಯನ್ನು ತೆಗೆದು ಹಾಕಲು ಆತ ಮತ್ತೆ ಶಸ್ತ್ರಚಿಕಿತ್ಸೆಗಾಗಿ ಆಸ್ಪತ್ರೆಗೆ ಸೇರಿದ್ದ. ಆದರೆ, ಶಸ್ತ್ರಚಿಕಿತ್ಸೆ ನಂತರ ಆತನಲ್ಲಿ ಸೋಂಕು ಕಾಣಿಸಿಕೊಂಡಿತ್ತು. ಶಸ್ತ್ರಚಿಕಿತ್ಸೆ ಅಪಾಯಕಾರಿ ಎಂಬುದು ಆತನಿಗೆ ತಿಳಿದಿದ್ದರೂ ಆತ ಶಸ್ತ್ರಚಿಕಿತ್ಸೆ ಮಾಡಿಸಿಕೊಂಡಿದ್ದ, ಬಳಿಕ ಸೋಂಕು ಉಲ್ಭಣಗೊಂಡು ಸೇಂಟ್ ವಾನ್ ಕೊಲುಸಿ ಸಾವಿನ ಮನೆಗೆ ಹೋಗಿದ್ದಾನೆ.
