19 ವಿದೇಶಿ ತಳಿ ನಾಯಿಗಳು ಪೊಲೀಸರ ವಶಕ್ಕೆ; 81 ಜನರ ಬಂಧನ! ಅಷ್ಟಕ್ಕೂ ಆಗಿದ್ದೇನು?

ನ್ಯೂಸ್ ಆ್ಯರೋ: ಪೊಲೀಸರು ನಡೆಸಿದ ದಿಢೀರ್ ದಾಳಿಯಲ್ಲಿ ಬರೋಬ್ಬರಿ 81 ಜನರು ಬಂಧನವಾಗಿದ್ದು 19 ವಿದೇಶಿ ತಳಿ ಶ್ವಾನಗಳನ್ನು ವಶಕ್ಕೆ ಪಡೆಯಲಾಗಿದೆ. ರಾಜಸ್ಥಾನದಲ್ಲಿ ಸದ್ಯ ಡಾಗ್​ ಫೈಟ್​ ಬೆಟ್ಟಿಂಗ್​ಗಳು ಜೋರಾಗಿದ್ದು. ಅಂತಹ ಬೆಟ್ಟಿಂಗ್ ನಡೆಯುತ್ತಿದ್ದ ಜಾಗಕ್ಕೆ ಪೊಲೀಸರು ಎಂಟ್ರಿ ಕೊಟ್ಟಿದ್ದು ಒಟ್ಟು 81 ಜನರನ್ನು ಬಂಧಿಸಿದ್ದಾರೆ.

ರಾಜಸ್ಥಾನದ ಹನುಮಾನಗಢ ಜಿಲ್ಲೆಯಲ್ಲಿ ಈ ದಾಳಿ ನಡೆದಿದ್ದು, ಒಟ್ಟು 19 ವಿದೇಶಿ ತಳಿ ಶ್ವಾನಗಳು ಹಾಗೂ 15 ವಾಹನಗಳನ್ನು ವಶಕ್ಕೆ ಪಡೆಯಲಾಗಿದ್ದು 81 ಜನರನ್ನು ಬಂಧಿಸಲಾಗಿದೆ ಎಂದು ಜಿಲ್ಲೆಯ ಎಸ್​ಪಿ ಅರ್ಷದ್ ಅಲಿ ಹೇಳಿದ್ದಾರೆ.

ಪೊಲೀಸರ ದಾಳಿಯನ್ನು ನೋಡಿದ ಇನ್ನೂ ಅನೇಕರು ಗೋಡೆಯನ್ನೆಲ್ಲಾ ಜೀಗಿದು ತಪ್ಪಿಸಿಕೊಂಡಿದ್ದಾರೆ ಎಂದು ತಿಳಿದು ಬಂದಿದೆ. ಘಟನೆಯಲ್ಲಿ ಲೈಸನ್ಸ್​ ಹೊಂದಿದ್ದ ಒಂದಿಷ್ಟು ಗನ್​ಗಳನ್ನು ಕೂಡ ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಡಾಗ್ ಫೈಟ್ ಬೆಟ್ಟಿಂಗ್​ನಲ್ಲಿ ಬಂಧನಕ್ಕೊಳಗಾದವರು ಬಹುತೇಕ ಹರಿಯಾಣ ಪಂಜಾಬ್​ನಿಂದ ವಾಹನ ಮಾಡಿಕೊಂಡು ಇಲ್ಲಿಗೆ ಬಂದವರೇ ಹೆಚ್ಚು ಇದ್ದಾರೆ ಎಂದು ಎಸ್​ಪಿ ಅರ್ಷದ್ ಅಲಿ ಹೇಳಿದ್ದಾರೆ. ಅಲ್ಲಿಂದ ಬರುವಾಗ ಅವರು ತಮ್ಮ ಶ್ವಾನಗಳನ್ನು ಕೂಡ ತಮ್ಮ ಜೊತೆಗೆ ಕರೆದುಕೊಂಡು ಬಂದಿದ್ದರಂತೆ. ಪೊಲೀಸರ ವಶದಲ್ಲಿರುವ ಕೆಲವು ಶ್ವಾನಗಳಿಗೆ ಕಾದಾಟದ ವೇಳೆ ಗಾಯಗಳಾಗಿದ್ದು ಅವುಗಳಿಗೆ ಚಿಕಿತ್ಸೆ ನೀಡಲಾಗುತ್ತಿದ್ದು. ಅವು ಪೊಲೀಸ್ ಇಲಾಖೆಯ ಕಾವಲಿನಲ್ಲಿವೆ ಎಂದು ಎಸ್​ಪಿ ದೃಢಪಡಿಸಿದ್ದಾರೆ.

ಇನ್ನು ಆರೋಪಿಗಳ ವಿರುದ್ಧ ಪ್ರಾಣಿಗಳ ಮೇಲೆ ಕ್ರೌರ್ಯತೆ ನಿಯಂತ್ರಣ ಹಾಗೂ ಜೂಜಾಟದ ಕಾಯ್ದೆಯಡಿ ಪ್ರಕರಣವನ್ನು ದಾಖಲಿಸಲಾಗಿದೆ.